ನುಡಿಬಯಕೆ

ಹುಳಿಯುಂಟು ಸಿಹಿಯುಂಟು ಖಾರದೊಗರುಂಟು ನೀರೂರುವ ಬಾಯಿಚಪಲದ ಜೊಲ್ಲಿನಂಟುಂಟು ಕುರುಮಿಸುವೀ ತಿಂಡಿಯ ತಿನಲು ಬರುವವರುಂಟು ಬಂದವರು ಲೊಟ್ಟೆಯಿಡಿಸುವೀ ತಿನಿಸ ಬೇಡಿದುದುಂಟು ಬೇಡುವಭರದಿ ಬೇಡದಾಚಾರದಾಚಾರಿಗಳಾದದ್ದುಂಟು ಅಣ್ಣ-ಬಯ್ಯ-ನಾದುದುಂಟು ಹುಳಿನೀರು-ಪಾನಿ-ಯಾದಂತುಂಟು ಕೊಡಿ-ದೋ-ಆದದ್ದುಂಟು ಸುರಮಿಸಿತು ಬಾಯ್ಸವಿಯ ತಿಂಟು ತಿನ್ನುವ ಆ ಹೊತ್ತು, ವಿರಮಿಸಿತು ತಾಯ್ನುಡಿಯ ನಂಟು ಮರೆಸುವ ಕೆಡುಹೊತ್ತು ಹೊರಗಿಂದಾಗಮಿಸಿ ನಾಲಗೆಯ ಮೇಲಾಡಿ ಒಳಹೊಕ್ಕು ಕಸವಾಗಿ ಭವಿ ಜರಜಜಾರನನ್ನಾಗಿಸುವ ಸವಿಯೊಂದು ಒಳಗಿನಿಂದುದಿಸಿ ನಾಲಗೆಯ ಮೇಲಾಡಿ ಹೊರಪೊಕ್ಕು ರಸವಾಗಿ ಕವಿ ಅಜರಾಮರನನ್ನಾಗಿಸುವ ಸವಿಯೊಂದು ಹೊಟ್ಟೆಹೊರೆಯಲು ಬಂದವನ ಮಾಯ್ನುಡಿಯ ಭಂಡಜೋರಿನ ಮುಂದೆ ಹೊಟ್ಟೆಹೊರೆಸಲು ಬಂದವನ ತಾಯ್ನುಡಿಯು ಮಂಡಿಯೂರಿತು ಅಂದೆ 'ಚೆನ್ನಾ'ಗಿ 'ತೂರ್'ಇ 'ದಾಲ್'ಆಗಿಸಿ ಬೇಳೆಬೇಯಿಸಿಕೊಂಡರು ಮೆಣಸ ಮಿರ್ಚಾಗಿಸಿ ಅಡಿಯಲ್ಲಿ ಉರಿಯಿಟ್ಟರು, ಬಂದವರು ಸಾರು ರಸವಿಲ್ಲದ ರಸವಾಗಿ ನಿಸ್ಸಾರವಾಯಿತು ಕೊತ್ತಂಬರಿ ದನಿಯಿಲ್ಲದ ಧನಿಯಾಯಿತು ನಮ್ಮವರ ತನ್ಮೆ ನೆಲೆಯಿಲ್ಲದೆ ಮಣ್ಣಾಯಿತು

ಉಣಲು ಕರೆದಳು, ಹುಟ್ಟಿರುವ ಹುಡುತಿರುವ ಹುಡಲಿರುವ ಅವುಅವೆಲ್ಲದಕೂ ಅದರದರ ಸವಿಯೊಪ್ಪವ ಅನವರತ ಅಡಿಸಿಯುಣಿಸಿದಣಿವಾರಿಸಿಮುಗಿಸಿ ತಿಳಿನಂಟನೆರೆದು ಸೊಗಯಿಸಿದ ನಿಜತಾಯಿ ಹಸಿಧಸಿದು ತನ್ನಮನೆಯವರನ್ ಉಣಲು ಕರೆದಳು ಹಸಿಕೆಂದಾವರೆಮೊಗದಲ್ಲರಳಿದಿನ್ನೆರಡೆಳೆಬೆಳುದಾವರೆಕಂಗಳ ಬಲುನವಿರದಳದೆವೆಗಳ ತೆರೆಯದೆ, ಕುಳಿತೇಮಲಗಿ ಏಳೇಳುಲೋಕದ ನಡೆಮಾಟವ ಒಳಕಂಗಳಲೇ ಕಂಢರಸಿಯುರಿಸಿಯಾರಿಸುವ ನಿದಿರೆಯಮದಿರೆಯ ಕುಡುಕನನ್ ಉಣಲು ಕರೆದಳು ಮನೆಯಲಿ ಮನದಲಿ ಸರಸಿಪೂರ್ಣಾನ್ನಳನ್ನಿರಿಸಿಮರೆಸಿ ಕಂಡಕಂಡಲಿ ಬೇಡಿತಿರಿದುಣ್ಣುವನಾಟಕವ ಬೆಸಸಿಯರಿವಿನತಿಳಿವರಡುವ ಸಲುವಾಗಿಸಲಹುವ, ಬಲುಯಿಂಪುನುಡಿವ ಕಡುಗೆಂಪಿನವನ ಬೆಡಗಿನಸೊಬಗ ನೆನೆದುನನೆದುತಣಿದು ಮೆಲುನಗುತಲಿ ಹಸಿಧಸಿದು ಹುಸಿಹುಂಬನನ್ ಉಣಲು ಕರೆದಳು ಹಣದೊಡತಿಯನಣುಗನಲಿರಿಸಿ ಹಣದೊಡೆಯನಕಾಲ್ಬಳಿನೆಲಸಿ ನೊರೆವಾಲಮರೆಸುವಂದದರಮನೆಯ ತೊರೆದಿರಿಸಿ  ಹಾಲಗಡಲನೊರೆಯಲುಕ್ಕಿಧೆಗ್ಗರಳವ ಸಾರಿಸಿಕೂಡಿಸಿ ಗಟಗಟಾಯಿಸಿ ಕುಡಿದೊಣಗಿದಗಂಟಲದಣಿವಾರಿಸಲೆಣಸಿ ಎದಿರೆದಿರಾಗಿಮೊರೆದೂರೂರರ ಕಾಯ್ದಮರುಳನನ್ ಉಣಲು ಕರೆದಳು ಬಲುಬಿಂಕದ-ಮೂರೂರುರಿದದನು ಮೈಯ್ಯಂಗವೆಲ್ಲೆಡೆಸವರಿಸಿ, ಬಲುಚೆಂದದ-ಮಾರನುರಿದುದನು ಮೇನಿಯಲ್ಲಡರಿಬಳಿಯಿಸಿ ಸುಡುತಿರುವೆಲುಬುತೊಗಲ ನಡುವೆಡೆಯೆಲ್ಲಾ ತನ್ನತಾನವುಸಿಕುಳಿಸಿರಿಸಿ ಮೇಣೂರಲ್ಲೆಲ್ಲಾ ಮೈಯಿಲ್ಲದ ನಿರ್ಮೇನಿಯಾಗಿ ಮೆರೆದಿಹ ಮಾಯಾವಿಯನನ್ ಉಣಲು ಕರೆದಳು